كيف بدأ الإنتربرونور أو كما يقولون الانطربنور Origin of Entrepreneur

من هو الإنتربرونور؟

وكيف بدأ الانطربرونور!

الانطربرونور بدايةً هو واحد اسمه تامر..

أو خالد..

أو ماجد..

هو لازم يكون واحد اسمه يكون على وزن رائد..

ساعات يبقى واحدة برضه..

ممكن يبقى اسمها علياء او عاليا او هانيا او تاليا..

ليه معرفش..

المهم..

ده اسمه..

كيف بدأ بـقــــــي!

مش طيب قبل ما نعرف كيف بدأ ومن أين أتى وإلى أين يمضي..

نعرف تعريفه (ايه ده انا بقول شعر ولا ايه!)

في كتب ريادة  الاعمال..

ايه ده هي الاعمال كمان بتلعب رياضة!

يعني مش الكابتن عمرو دياب بس؟!

هششش..

ريادة الاعمال يا حضرات مش ريادة..

نبطل قلش بقى..

في كتب ريادة الاعمال رائد الاعمال ده واحد بيشيل على عاتقه اكتر ما عاتقه يقدر يشيل..

وبيكون مش عاتق اي فكرة تعدي قدامه ممكن يفكر فيها ويدرسها وبنفذها  كمان..

وغالبا عاتقه مش بيقدر يستحمل اكتر من 3 سنين او 5 سنين بالكتبر وعاتقه بينقطم زي ما وسطنا بينكسر كده لما نشيل حاجة تقيلة..

طيب بيعملوا ايه برضه رائد وتامر وهاشم وماجد وخالد دول!

رائد او تامر او هاشم او ماجد اتخرج عادي زيه زي اي كامل او عادل او حسين او محمد

زيه زي باقي الخريجين يعني..

واشتغل بعد الكلية عادي..

لا عادي ده مش من اسمائه ده عادي اللي هو عادي زي بتاعة احمد حلمي عادي اهوه

اشتغل فين الانطربرونور؟

في شركة عالمية عابرة للقارات وجاذبة للمهارات..

اتعلم في الشركة دي كويس؟

ده كان بيعمل اكسيل شيت وهو مغمض يا جدع..

كان بيقبض كويس؟

يكفيني اقول لك انه كان بيشتي في الجونة

وبيفطر في ستاربكس وبيشتري 4 جاكتات شتوي ومش في السيل..

امال سابها ليه وبقى رائد يا عيني؟

مانا جايلك اهوه هو انت وراك حاجة ما انت عارف الفيديو بتاعنا بيقعد  بكتيره 10 دقايق 

اللي حصل انه مع ثورة الانترنت فائق السرعة ووصول سرعة النت الى 1 ميجا بيت

عينه اتفتحت على حاجات مكنش يعرفها ايام النت ابو زيرو تلات سبعاااااات خمستلاف

(عارفك بتغنييها وانت بتقراها يا محنك J)

07775000

احم احم..

فقوم ايه..

وهو بيدور ويدعبس عالنت عن صور

قرا كلام عن واحد اسمه جيف بيزوس وازاي انه بقى مليونير

اه هو بتاع امازون اللي دلوقتي بقى اغنى واحد في الكون والمجرة والنت و

قعد ليلتين ماينامش ولا يروح الشغل..

قاعد في ستاربكس باللابتوب بتاع الشغل يدور ويقرا..

لقى كلام عن جوجل وغير جوجل

اللي بدأ مشروعه من جراج بيتهم واللي بدا من مطبخ جارتهم

اللي بدا بدولارين واللي كان محوش حوالي الفين..

كثف من وجوده في ستاربكس

وبدأ يطلب دوبل اسبرسو بدل ما كان بيطلب فرابتشسينو

على اللابتوب التاتش بدأ يرسم خريطة لمشروع العمر

مش الجواز لا

الجواز مشروع مؤجل

هتجوز شركتي

هكذا قرر او خيّل له خيال المآتة وظل يتساءل:

من هو الإنتربرونور؟

1. هل هو حمادة شيراتون؟
2. زيزو نتانة؟
3. عم محمود بتاع عربية الفول اللي قدام وزارة البحث العلمي في شارع القصر العيني؟
4. وائل غنيم بتاع الثورة اللي بقى بيعمل فيديوهات مش عن الثورة وبيكسب من النت وعمال يشتري ويشرب؟
5. الخليل كوميدي اللي فلقنا ولم فلوس من النت وفتح محل دهب في المنصورة؟

وكمل ليستة فيها 100 اسم تاني احنا بس مش عاوزين نتقل على حضرات السادة المشاهدين

و مع كل رشفة من قدح الاسبرسو كان بيطلع فقاعة فوق دماغه:

كيف بدأ بيل جيتس؟

بداية بيل جيتس كانت جراج في الحارة اللي ورا بيتهم..

كيف بدأ ستيف جوبز؟

رمى عربيته ورمى الجيرل فريند بتاعته وراح جر شكلها

قصدي جر باب الجراج وقعد يفكر زي ما نيوتن كان بيعمل يوم ما التفاحة وقعت علي راسه

ومن الجراج دهوه بدأت ابل..

فقال ليه مابقاش زي وظايف وبوابات!

مين وظايف وبوابات دول؟

Steve jobs

Bill gates

اه فهمت..

بس انا ماسمعتش ان حد في مصر بقى زي الجماعة دول!

اه هو انا ماقلتلكش!

مش 90% من المشاريع الناشئة والانطربرونورز بعدما بيسيبوا الجراج

بعدما يتوسعوا..

ويكبروا  ويشتغلوا..

ويكتبوا على بروفايلهم كلام عميق..

ويطلعوا دهب يعملوا ميديتيشن

بس بتواجههم مشكلة واحدة بس..

بيقفلوا في خلال 5 سنين..

وبيرجعوا الجراج ..

بس المرادي عشان يخزنوا في المكاتب والكراسي بعد ما المشروع ما فلس…

شوفوا كده قصة إنجريد كمبراد وريادة الاعمال

عرفتوا بقى من هو الإنتربرونور؟