التسويق الحسي أو Sensory marketing هو نوع مهم جدًا من أنواع التسويق، الفكرة الأساسية فيه إنه بيعتمد عالحواس. ولأننا كبشر زينا زي باقي الكائنات الحية بنمتلك 5 حواس،نقولهم؟ هم اللمس والشم والتذوق والبصر والسمع، ربنا يمتعنا ويمتعكم بيها كلها يارب
بس مش ده موضوعنا
موضوعنا إننا لو دققنا كويس
هنلاقي اننا في وسط آلاف الرسائل الاعلانية والتسويقية اليومية
بنتعرض للنوع ده من التسويق كل شهر وكل أسبوع ويمكن كل يوم.
مش مصدق ولا مش مركز ولا مش شامم ولا مش مستطعم؟
تعالوا نشوف مع بعض
وهنلاقي الأمثلة كتير الحقيقة
يلا بينا نعدي كده من قدام محل آيس كريم
فنلاقي عم جمال بيعمل البسكوتة بالسخان بتاعها طازة بطازة
إيه اللي بيحصل لك ساعتها!
من وإنت طفل في إيد بابا لحد ما بقيت بابا وفي إيدك طفل؟
بتاخد قرار الشراء بسرعة
ويتكرر الموضوع مرارًا وتكرارًا
وهكذا دوليك دواليك
ليه بقى؟
لأن وصول الرائحة الطعمة اللذيذة للفانيليا المركزة في البسكويت أثناء تسويته قدام المحل
حاجة من إتنين
إما بتبسطك 🙂
البسكوتة بتبسطك؟
أو إنها بتفكرك بذكريات حلوة مع بابا أو مع شلة صحاب أو إنك رحت جليم وكلت آيس كريم
او بيحمل ليه ذكريات مثلا لمرات سابقة كل فيها آيس كريم في المكان ده مع لمة او صحاب او عيلة..
عديت قبل كده من قدام مطاحن البن البرازيلي في محطة الرمل!
بتقدر تقاوم!
طيب محل الطعمية ولا فرن العيش الفينو ولا محل الكباب
جعت ولا لسه!
ننتقل من التسويق عبر الشم إلى حاسة أخرى
لما نسمع مثلا الjingle المميزة لتليفون معين ارتبطنا بيه زي رنة الآيفون مثلًا
أو زمان نغمة نوكيا أو الموسيقى اللي بتسمعها لما تشغل الجهاز لأول مرة
المشاعر المصاحبة للرنة أو النغمة دي بتربط العميل بالمنتج جدًا
وبيخلي فيه بينهم عاطفة واحاسيس متبادلة زي اللي بتنشأ بين البشر تمام..
فارتباطك بالمنتج بالطريقة دي بيخليك تشتريه
وتشتريه تاني
وتحب تشتريه كل مرة
لأن المسوق لعب على عاطفتك
ومش أي عاطفة
دي عاطفة مصحوبة بحواس
من أشهر بقى الأمثلة اللي استخدم فيها التسويق الحسي
كانت تجربة نفذتها دانكن دونتس Dunkin Donuts في سول عاصمة كوريا الجنوبية
فيلا بينا نسيب عم جمال بتاع الآيس كريم ونروح سول
زي ما معروف كده إن مؤمن بتاع سندوتشات (راجع مقال دورة حياة المنتج ومؤمن ليه مبقاش بتاع سندوتشات من هنا)
فدانكن دونتس شافت إنها معروف عنها إنها بتاعة دونات
مش بتاعة مشروبات
وعلى وجه الدقة مش بتاعة قهوة
بس بدراسة السوق
وجد أن آلاف الكوريين وهم رايحين الشغل الصبح بيشربوا قهوة
في وقدام محطات المترو والقطار المزدحمة قهوة قهوة قهوة
معروف إن سول هي عاصمة القهوة
بس كله ستاربكس
اكتر من 200 فرع من المقهى الامريكي الشهير
مبيعات خرافية من ستاربكس
محلات في كل مكان ستاربكس جنب ستاربكس جنب ستاربكس
وطبعا معروف إن ستاربكس بتاع قهوة
فكان التحدي أمام فريق تسويق دانكن دونتس
إزاي نخلي الناس تشرب قهوة من عندنا مع أكلهم للدونتس بتاعنا!
وبعد جهد وتفكير جوه الصندوق وبره الصندوق
وفوق البيعة اشتغلوا كمان على السينسوري ماركتنج
التسويق الحسي في دراسة حالة دانكن دونتس
A perfect case study بصراحة
فعملوا جهاز بيتركب في الحافلات
بيطلق رائحة القهوة كلما اشتغلت نغمة دانكن دونتس الشهيرة في اعلانات الراديو
كل ما النغمة تتلعب
الجهاز اللي شبه جهاز معطر جليد يطلق رائحة القهوة
فيحصل إيه؟
مرة في مرة في مرة
تتنبه الحواس
وتربط بين المنتَج product وهو القهوة وبين المنتِج producer وهو دانكن دونتس
فلما ينزلوا من المترو يلاقوا إعلان دانكن دونتس
هتشتري ولا هتكمل قراية؟
الفكرة المبدعة والخارجة عن الصندوق عملت المطلوب منها
16% زيادة في زيارات الكوريين لمتاجر دانكن دونتس
والمبيعات زادت ب 29% في الأماكن اللي اتعملت قدام المحطات
لأن اللي اشترك في الحملة أو شافها أو شمها أو سمعها
كان عددهم 350 ألف شخص
وطبعًا كل واحد ممكن يحكي لبيته وشغله عن اللي شافه وسمعه وشمه واستطعمه
يعني حملة مليونية ممكن بتكاليف معقولة
وهي دي شطارة الجوريلا ماركتنج
ومن بعد الحملة التسويقية الناجحة دي
دانكن دونتس بقى بتاع قهوة ومشروبات مش بس بتاع دونات
وهي دي حلاوة التسويق
وقبل ما نسيبكم ونطلع من محطة التسويق دي نسيب لكم سؤال للتفكير:
لو إنت مسؤول عن منتج فوط قطنية هينزل السوق جديد
والموسم هو موسم المصايف أثناء فصل الصيف
ممكن تعمل إيه عشان تسوق له باستراتيجية الجوريلا ماركتنج أو تسويق العصابات
وعن طريق التسويق الحسي مش أي طريقة تانية!؟
إيه رأيكم؟
قولولنا في التعليقات عن تجاربكم الشخصية مع التسويق الحسي أو ال Sensory marketing؟
إيه المنتج اللي أثر فيكم عن طريق حاسة من الحواس الخمسة وجربتوه ولقيتوه حلو فحبيتوه!
#tamerelmoghazy
#marketing
#Guerrilla_marketing
#Dunkin_donuts
#starbucks
Pingback: ما هو تسويق العصابات؟ آيكيا و7 أمثلة مبدعة
ا
ا